Bayern Munich n.a champions for Europe

Bayern Munich don win the 2013 champions
League on Saturday night for inside de
Wembley Stadium wey dey for London afta
dem beat Borussia Dortmund 2-1 for de final.
Bayern Munich also enta de final last season,
but water pass garri for dem as Chelsea beat
dem for de final.
Na even Bayern Munich be de last German club
wey win de champions League last in 2001, and
dia win over Dortmund for Wembley kon make
am be de 5th time wey dem go win de
champions League for dia history.
Borussia Dortmund also don win de champions
League one time for dia history in 1997 wen
dem flog Juventus for de final and na since dat
time dem don dey eye de final.
Borussia Dortmund take beta swagga stat de
game wen Robert Lewandowski waya beta shot
wey suppose be de first gol for Dortmund, but
Bayern Munich golkipa, Manuel Neuer dey
kampe for post as him parry de ball for
corner.
Borussia Dortmund kon continue to nack
Bayern Munich plenty attack as dem see say
Bayern neva get diasef for de match and
walahi, na dia golkipa, Neuer save Bayern again
as de guyman take him right hand kommot de
hot shot wey Marco Reus waya am.
Bayern Munich kon see dia own beta chance
wey dem suppose score dia first gol wen
Ribery carry correct pass give Arjen Robben in
de 30th minute, but de sabi winga no fit score
as Borussia Dortmund golkipa, Weidenfeller try
die as him save de ball.
Bayern Munich score dia first gol in de 60th
minute wen Ribery and Robben tap correct ball
for de wing and Dortmund defendas kon dey
look like agbero as dem allow Mario Mandzukic
to waya dem de gol.
Borussia Dortmund kon vex afta Bayern Nack
dem de first gol and dem try to ekwalise in de
68th minute wen Bayern defenda, Dante nack
Marco Reus for inside de 18 yard box and de
refiree no waste time as him give Dortmund
penarity.
Gundogan na him kon be de guyman wey score
de penalty for Dortmund and naso de game
just dey sweet dey go.
Na for de die minute na hin Arjen Robben kon
score de winning gol for Bayern Munich as de
guy drible all Dortmund defendas before him
kon finish dia golkipa in de 90th minute.
Borussia Dortmund try die make dem ekwalise,
but Bayern Munich no gree for dem again and
naso Bayern take win de game 2-1.